|
Nini Azlu?
Azlu katika Istilahi ya sheria ni kitendo cha mume
kumwaga manii (mbegu za uzazi) nje ya uke wakati wa kufikia kilele cha tendo
la ndoa. Kwa maana hii kitendo cha ndoa (jimaa) katika sura hii kinakamilika
bila ya manii ya mume kukutana na yale ya mkewe. Nini lengo/madhumuni ya
Azlu?
Mume na mke huitumia njia hii ya “Azlu” kwa
maridhiano baina yao kwa lengo la kuzuia kushika mimba kwa sababu maalum
inayozingatiwa na sheria. Sababu hiyo inaweza kuwa ni ulezi wa mtoto ambaye
bado anahitaji malezi ya karibu zaidi ya mama yake. Kushika mimba wakati huo
kutapelekea kumpokonya baadhi ya haki zake za malezi na hivyo kumsababishia
udhaifu wa mwili na akili ambao unaweza kuendelea katika maisha yake yote.
Dalili/Ushahidi wa Azlu.
Zimepokelewa hadithi nyingi katika
kuhalalisha na kujuzisha “Azlu” kwa ufumbulizo (uwazi) kabis pia ni vema
ikafahamika kwamba “Azlu” ni tendo kongwe lililokuwepo hata katika zama za
Bwana Mtume Rehema na Amani zimshukie. Baadhi ya masahaba wa Mtume waliitumia
azlu kama njia ya kuzuia mimba na Mtume alikuwa akijua lakini hakuna kauli ya
ufumbulizo iliyopokea kutoka kwa Mtume kwamba aliwakataza jambo hilo. Mas-ala
haya ya “Azlu” ni mas-ala ambayo mafaqihi (wataalamu wa sheria ya Kiislamu)
wameyashughukia sana kwa kuyatafiti na kuyajadili na kuyatolea maoni
mbalimbali. Ukipenda kuziona rai na kauli za mafaqihi kuhusiana na mas-ala
haya, unashauriwa kurejea vitabu kama:-
1.
Ihyaau uhumid diyn Imam Ghazaal
2.
Al-jaamii Liahkaamil Quraan Alqurtubiy
Zifuatazo ni baadhi ya “Nasi” na nukuu
zinazoithibitisha “Azlu”
1.
Imepokelewa kutoka kwa Jaabiri Ibn Abdillah Allah amuwiye radhi
kwamba mtu mmoja alimuendea Mtume Rehema na Amani zimshukie akamwambia:
Hakika mimi ninaye mjakazi (suria) ambaye ni mtumishi na mnyweshelezaji wetu
wa mitende. Mimi humzungukia (humuingilia) na sipendi ashike mimba! Mtume
Rehema na Amani zimshukie akamwambia: “ Mfanyie “Azlu” ukitaka, kwani hakika ya hali atapata tu alichokadiriwwa
(akipate)”. Muslim.
Maelezo: Kauli
ya Mtume (kwani hakika ya hali atapata tu alichokadiriwa), inamaanisha kuwa
ikiwa Allah amemuandikia kushika mimba, basi atashika tu, huyo mimba kwa muda
uliokadiriwa ashike bila ya kizuizi.
2.
Imepokelewa (tena) na Jaabir Ibn Abdillah Allah amuwiye radhi
amesema: “Tulikuwa tukifanya Azlu” katika zama za Mtume Rehema na Amani
zimshukie na il-hali Qur-aan ikishuka.”
Maelezo: Kauli ya Jaabir: … na il-hali Qur-aan
ikishuka) inaonyesha uhalali wa suala zima la “Azlu”. Kwani kama ingelikuwa
ni haramu, basi Qur-aan ingelikataza na kukemea kwani ilikuwa bado inaendelea
kushuka. Kwa kuwa haikushuka aya kuharamisha, basi hii ni dalili na ushahidi wa
wazi kwamba “Azlu” inajuzu ikiwa kuna haja ya kufanya hivyo.
3.
Imepokelewa kutoka kwa Ibn Abbaas Allah awawiye radhi amesema:
“Amekataza Mtume wa Allah Rehema na Amani zimshukie kumfanyia “Azlu” mwanamke
muungwana ila kwa idhini yake”. Abdul-rasaaq na Al-baihaqiy
Maelezo: Kauli ya Mtume “--- ila kwa idhini yake”
inashiria kuwa “Azlu” inajuzu kwa ridhaa na idhini ya mke.
4.
Imepokelewa kutoka wa Abuu Said, amesema: Mayahudi walisema: “Azlu”
ni uuaji mdogo, Mtume Rehema na Amani zimshukie akasema “Wameongopa Mayahudu,
hakika Allah Mtukufu lau atataka kuumba cho chote, hawezi yeyote
kumzuia”.Ahmad na Abuu Daawaoud.
Maelezo: Kwa mujibu wa hadithi; “Azlu” si jinai
“Azlu” haimzuii Allah kuumba anachokitaka na alichokikadiria ifuatayo
inaliweka wazi hilo.
5.
Imepokelewa kutoka kwa Anas Ibn Maalik Allah amuwiye radhi amesema:
mtu mmoja alikuja kumuuliza Mtume wa Allah Rehema na Amani zimshukie
kuhusiana na (suala la) Azlu’ Mtume akamjiibu: “Lau maji (manii) ambayo mtoto
huwa kutokana nayo (maji hayo) utayamwaga juu ya mwamba, basi bila ya shaka
Allah atamtoa mtoto katika mwamba huo. Au yatatoka (hayo maji) humo mwambani
na Allah ataumba ataumba tu nafsi
atakayo yeye kuiumba.” Ahmad na Al-bazaar.
MADAKTARI (MATABIBU) WA KIISLAMU NA NJIA ZA KUZUIA
MIMBA.
Kumbukumbu sahihi za kihistoria zinathibitisha
kwamba matabibu wa kiislamu walitafiti njia mbalimbali za kuzuia mimba kwa
misingi inayokubalika na uislamu. Kisha tafiti hizi na matokeo yake
zikahamishwa na kupelekewa ulaya na
baada ya muda, ulimwengu ukafanywa uamini kwamba ziliasisiwa na matabibu
wazungu wakristo mwenye kuangalia kwa uchunguzi katika vitabu vya utabibu vya
zama za ustawi wa uislamu atagundua vimekusanya milango maalum inayoelezea
njia mbalimbali za kuzuia mimba. Vitabu hivi vimeendelea kutumiwa na kusomeshwa
katika vyuo vikuu vya ulaya mpaka katika karne ya kumi na saba Miladia.
Vifuatavyo ni baadhi tu ya vitabu hivyo:-
1.
Al-qaanun cha Ibn Siynaa
2.
Al-haawiy Fiy Twibbi cha Ismail Al-jirjaaniy
3.
Al-kitaabul Malakiy cha Aliy Ibn Abbaas
4.
Al Irshaad cha Ibn Al-jaamii
5.
Tadhkirah Daawoud Al-antwakiy
Kwa mfano tatibu bingwa muislamu; Ibn Siynaa
amesajili katika kiabu chake Al-qaanuun njia ishirini (20) za kuzuia mimba
bila ya kuidhuru afya ya mama au mfumo mzima wa uzazi na kumsababishia
ugumba. Njia zote hizi zilijaribiwa na kuonyesha mafanikio makubwa.
Ziliendelea kuwa ni msingi usioepukika wa kuanzia kwa matabibu wa leo. Njia
hizo zilikusanya kwa pamoja matumizi ya vyakula na madawa kama asali, siki
(vinegar), tindikali (acid), chumvi na zeti ya hardali (mustard) na
kadhalika.
HITIMISHO.
Nasi na nukuu za hadithi tulizozitaja katika
kujuzu kwa “azlu” na kushughulika kwa mafaqihi na matabibu wa Kiislamu katika
suala hili. Huu ni ushahidi dhahiri kwamba watu tangi enzi hizo kwa sababu
mbalimbali za kimazingira (kijamii) na kisiha walihisi kuwa kuna haja ya kuwa
na mpango wa familia (uzazi wa mpango). Kadhalika inaonyesha kwamba
walilipatia ufumbuzi sahihi tatizo la uongezekaji wa idadi ya watu
ilinaloupigisha ulimwengu kelele hivi sasa. Ufumbuzi wao huu ulifanywa kwa akili
na werevu mkubwa chini ya misingi ya sheria za Allah. Isitoshe inadhihirisha
ni jinsi gani ulivyokuwa mtazamo wao katika jukumu lao kwa familia zao. Kwa
kuujua uzito na ukubwa wa dhima hii ndio waktafuta njia za kupanga familia
ili ziwe ni wasila (njia ya kusaidia) wa kuwasaidia kuyatekeleza majukumu yao
haya kama wanavyopaswa na walivyoamrishwa na sheria.
| 